بعض الشيء عن كل شيء © Asmaa Khairy

في غمرة الاحداث التي تتسارع حولنا ، كثوار ، ربما نسينا ،ربما تناسينا ، أن هناك فئات أخرى من الشعب ، ليس لها أن تقتحم امن الدولة ، ولا ان تعتصم في التحرير ، ولا يريدون شيئا سوى أن يعيشو في حالهم !

ربما من حنقنا نتناسى ، ربما من خوفنا من الخوف نعمي أعيننا و لكن ، هذا لا يعني عدم وجودهم ، ولا ينفي أنهم فئة كبيرة من الشعب ، أكبر من المتظاهرين ، أكبر من أمن الدولة ، أكبر من البلطجية ، و لكن أدق و أصغر من الخوف ..

 

و في غمرة الاحداث .. تنسى الفئة الكبيرة ، أنه لولا عيال التحرير مكنش هيتحقق حاجة ، و لولا انهم رجالة ، مكنتش حاجة في البلد هتتغير !!!!

 

و لكن المشكلة الكبيرة جدا و العويصة .. أنه الشعب متقسم أربع أقسام

قسم التحرير

و قسم الي يطالب بالاستقرار و نبوس ايدكم كفاية كده

و قسم تالت بلطجية

و قسم الفساد

و خلينا نضيف قسم خامس

الناس اللي سكتت ع الفساد و دلؤقتي خايفة تقوم بعملها لتذر وزر الفاسدين

 

و كل قسم من دول شايف نفسه صح ،و لكن ..

 

مش كلهم صح .. و مش كل وجهات النظر صح .. لكن مين يسمع مين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

 

دلؤقتي شباب التحرير شايفين أنه مش كفاية .. و أنه وجودهم في التحرير مبيعطلش البلد انما بيمشي حالها و بيخلي الحكومة تشتغل

و في نفس الوقت شباب التحرير ميعرفوش أنه البلطجية -بنوعينهم :اللي مسيباهم الشرطة بمزاجها ، و اللي ماشيين بمزاجهم هما -عاتيين في البلد فساد ، و اسمحولي أقول أنه في حالات اعتصاب كتيرة و لعل أفظعها الست اللي اتاخدت من جوزها على طريق الشروق و 22 واحد ….لحد ما جالها نزيف بعد 3 ايام و راحت ع المستشفى منهارة

و لعل برده شباب التحرير ميعرفوش انه البلطجية بيعذبوا الشرطة علنا .. و بيمسحوا بيهم الارض ، و الحادث اللي الالسنة كلها عمالة تلوك فيه هو معاون امن الشرابية اللي مسحو بكرامته و كرامة عياله الأرض

و لعل شباب التحرير حاسس بقهر من الناس اللي بتقوله كفاية كده ، لان كفاية كده دي بتتقال من يوم 29 يناير

و خلوني أقول ..

مفيش حد في مصر شايف الصورة كاملة

دلؤقتي البلد بلدنا ، و الشعب حتى و لو كان خايف ، فهو مننا .. هو  شعبنا ، و اهم حاجة عشان البلد ترجع تاني – الامن

 

و ان كانت الشرطة مش ناوية تنزل .. سواء لوي دراع للتحرير ، او خوف من البلطجية اللي هما ذلوهم سنين و سيبوهم علينا

يبقى اللجان الشعبية تنزل تاني .. و لو هنتعبكم و نقولكم صبح و ليل

الشعب يرجع يثبت انه حاميها .. و انه الحرامي ملوش مكان فيها

 

الجيش هيساعدنا نرجع البلد لما يشوفنا بنعمل حاجة

زي ما حصل يوم 28 يناير بالليل

 

احنا 85 مليون في مصر ..

الناس اللي لسه بتخاف دي تبطل خوف ، تنزل الرجالة يحمو البيوت.. كل واحد و هو نازل يخبك على جاره ..

نفسي اسأل الناس بتوع نستقر

هتستقروا ازاي

لازم تغيروا بايديكم

 

 

 

حاجة كمان مهمة جدا جدا جدا .. الناس اللي في التحرير .. زمان كانت في لجان على مداخل الميدان بتفتش دلؤقتي مفيش .. و بقى في بلطجية و بقى فيه ناس بتدخل مهياش مننا و بيتحسبوا علينا و تصرفاتهم بتتحسب علينا ، بامانة ، لازم ترجع لجان التفتيش ، و لو حتى لجان دورية ، او باي طريقة اللي في التحرير أدرى ينظموها

 

الناس كلها لازم تفهم بعض

 

 

اللي غلط هيتحاسب و هيتحاكم .. ومحدش يقولي منظرنا بره ، احنا بره و الناس لو عليها تفرش للمصريين الارض رمل و ورد

 

منظرنا خ*ى “ناس كتير اوي قالتهالي “و افكرهم تاني برمانة الميزان

عارفيين ايه اللي هيعدلها .. هدها و ابني من اولها

 

هدينا نظام فاشل ، و امبارح بس عملنا سابقة في تاريخ البشر .. هزمنا امن الدولة .. دخلنا العاصمة

 

دلؤقتي وقت البناء

 

احنا شباب الوقت عندنا دهب

الفرق بين الثانية و الثانية في التويتات ممكن يفرق في حياة بشر ، في اعتقال ناس ، في مصير انسان

 

دلؤقتي وقت البناء

و اول خطوة في ده نرجع الامن

 

انا معنديش اي اعتراض على وجود الناس في التحرير لاني مؤمنة انه ده مبيوقفش البلد و احترامي الشديد لدكتور عصام شرف انه لو كان شايف انه فض الاعتصام واجب كان قال

 

اللجان الشعبية لازم تنزل تاني

المنظمات الحقوقية لازم تبدأ شغلها

1-توعي الناس بحقوقها

2-لو عرفوا انه في حد ليه حق ، يمدوا ايدهم و يساعدوه يتجاب

 

لازم نرجع نبني الثقة في ميدان التحرير بينا و بين الشعب اللي زي ما احنا شايفين مش عارف مصلحته فين

لازم نبدأ نوعي الناس و نحاول نوصل لقلوبهم (ونستحمل كمية الشتايم اللي هتنزل علينا زي الحنفية )

 

الميدان مش حرام

ولا البيوت حرام

كل واحد شايف انه يقدر يقدم للبلد حاجة من طريق معين

محدش ينتقد التاني

بس يساعده

 

الشعب اللي فضل اكتر من 50 سنة ميعرفش حق لنفسه ولا باطل ، و الألعن والأدل ، ميعرفش واجبه لازم يتوعى .. و ده دور كل الناس الواعية توعي اللي حواليها

لازم يبقى فيه التكافل الاجتماعي .. ما هو لو سيبنا الجعان جعان في الاخر هياكل من لحمنا

 

عرفنا معنى الحرية اهو .. الحرية مسئولية كبيرة جدا ..لازم الشعب كله يشيلها .. اللي خايف منها .. لازم يتعلم ميخافش

 

و لازم العالم كله يعرف انه كلمة عمر سليمان

يوم ما قال للقنوات الاجنبية

 

انه الشعب المصري غير مستعد للديموقراطية

 

لازم تتنفي و النفي بتاعها يبقى عملي

 

لازم يتثبت انه الحرية مسئولية و الشعب المصري عارف حجمها

و واثق و اثبت انه قدها

 

 

 

كلمة اخيرة .. عندنا مليون ونص جايين من ليبيا .. و يقال انه اسرائيل بتعمل تعبئة عامة للجيش ، و الفتن الطائفية بتحاول تلاقي طريقها من كنيسة حلوان للكنايس في رفح !!

محدش يخاف ..

البلد ليها ربنا .. و ربنا هيساعدها و يحميها

 

امانة عليكم

ايدنا في ايد بعض

اللي في التحرير و اللي في البيوت

دلؤقتي مفيش نظام

 

احنا النظام

 

و انه لقول لو تعلمون عظيم

 

انا مش خايفة

متفائلة .. ربنا ا فوق في السماء حامينا و هينصرنا

هينصرنا على كل شرير و شيطان

 

 

بس نحط ايدينا في ايد بعض

لان الفرقة ضعف

 

 

 

اتفقنــــــــــــــــــــــــــــــــــا ؟؟؟

 

 

 

اسماء خيري

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Tag Cloud

%d bloggers like this: