بعض الشيء عن كل شيء © Asmaa Khairy

صباح الخير يا مصـر

أتثائب بكل برود ، أجر خطواتي الثقيلة إلى ناحية باب الشقة حيث توجد النتيجة ،أجل اليوم هو الخميس، 16 يونيه، أنتظرته من أول الأسبوع ، و ها هو قد جاء ،أخيراً!!

الحقيقة يا مصر أن اليوم هو يوم التدوين ضد قانون تجريم التظاهرات  والاعتصمات ،و بغض النظر عن القانون،فأنا أدون ضد تجريم التظاهر و الاضراب و الاعتصامات !!

و قبل أن أبدأ أحب أن أنوه السادة النخبة ،أصحاب لفظة”فئوية”- أيوة السادة النخبة اللي راكبين الموجة- أن هذه الثورة لم تكن لتكمل خطواتها الأولى على خير – اعتصام الـ18 يوم و رحيل مبارك -دون بوادر العصيان المدني  التي ظهرت في الأسبوع الأخير ، ما بعد الأحد 6 فبراير ، ربما لا يعرف عديد من ثوار ميدان التحرير ذلك ، لكنني كـ(اسمحولي انسب نفسي للثورة ) ثورية لم تسنح لي فرصة نزول الميدان كنت أراقب من التلفاز ما يدور في الشارع و كان هناك مظاهرات  في عدد من المصالح و النقابات و الجامعات على مستوى الجمهورية ،مطالبة بحقوقها و تتحرك من مكانها للانضمام الى ركب الثورة في الميادين الكبيرة  ،مما أجزم أنه قد دفع بالأدرينالين في جسد الدولة ،أو النظام ،و أشعره -أنه لازم يبتر مبارك و إلا البلد هتروح في داهية .

أما و قد أوضحنا ذلك ، فخلونا نتكلم مع بعض من غير فصاحة و كلمات مجعلصة ، كلمة فئوية جاية من كلمة فئة ،و فئة معناها مجموعة من الناس تربطها حاجات مشتركة ،يعني مثلا مجتمع فيه فئات عمرية مختلفة ،أوفئات مهنية مختلفة ،أوفئات نوعية مختلفة ، و فئات دينية مختلفة إلخ .. يعني لو حسبناها .. هنلاقي انه لو في مجتمع مفيهوش فئات ،ميبقاش مجتمع اصلا !! اتفقنا ؟تمام

طب يعني ايه بقى مظاهرة ولا اضراب ولا عصيان ولا اعتصام، ايون ، الكلمات المجعلصة اللي بتخلي الشاي يقف في زورنا كل يوم الصبح و احنا بنقرا مانشيتات الجرايد- بالمناسبة انا اول من تنبأت بالمانشيتات دي عشان كده مبشربش شاي من و انا صغيرة فئوية بقى – ،المظاهرة بتبقى وسيلة للظهور،يعني مثلا انك تعلي صوتك فتلفت الانتباه ، تظهر للناس كده ، و المظاهرة بتبقى لاظهار مطالب معينة بخصوص حاجات معينة ، او رفض وضع ما ،لأسباب مختلفة مثلا ، دي المظاهرة ، الاضراب بقى ، هو الامتناع عن العمل او عن الاكل او عن اي حاجة – و ربما يجدر بنا ذكر حاجة بتضحكني كل ما افتكرها لما وزير من الوزارء قال ايه المشكلة اما يضربو عن العمل في الاجازة -العصيان هو عدم الانصياع للاوامر من الاخر ، يعني مش هنعمل اللي انتو عايزينه الا اما يتعملنا اللي احنا عايزنه نقطة و من اول السطر،اما الاعتصام ، فهو حاجة شبه المظاهرة لكنها ممكن تمتد لأيام طويلة لرفع مطالب واغلب الاوقات بيبقى في مطلب حرج مطلوب تنفيذه لفض الاعتصام – زي ايام الاعتصام الفئوي بتاع الناس اللي كانت مخنوقة من مبارك في التحرير !

بعد ما مبارك تنحى ، اي حد يفكر يطالب بحاجة ،يقولك ده بيوقف عجلة الانتاج و بيخرب البلد ،من اول حكومة شفيق ، لحد حكومة شرف  اللي وزير الملاية بيعتبر المطالب الفئوية دي”صداع شخصي”لحضرته

لا بقى بالعكس اولا التظاهرات الفئوية مش بتوقف البلد ،و لوهتوقف البلد و تشغل الحكومة بس،انا شخصيا موافقة ،المشاكل دي كلها ممكن تتحل لما نحط أدنى للأجور،نحط حد ادنى للأجور ازاي و البلد مفيهاش فلوس ، ،اه طبعا ،ده لو الفلوس بتاعة مبارك و الشلة بتاعته رجعت مش هنعرف برضه نحط ادنى ليه؟ لان عندنا ناس في مصالح بتاخد 139 جنيه وناس بتاخد 139 الف جنيه ،يعني بنسبة1:1000، عايزين حد ادنى وحد اقصى للاجور ، اه عايزين توزيع عادل للثروة في مصر ، عيب ، ده الثورة اول ما طلبت طالبت بالعيش و الحرية و العدالة الاجتماعية و الكرامة الانسانية ..حكومة الثورة مش عاجبها ليه بقى ؟؟؟

اما بالنسبة للقانون ، فالقوانين ملهاش لزمة ان لم تفعل ،و لما يتقبض على فلاح ولا عامل عشان تجرأ و طالب بحقه ، و تقوله يخرج بكفالة زي اللي خرجت بيها عايشة عبد الهادي يبقى احنا بنهزر ،  و لما تتعمل وقفة و يتم الافراج عنهم بلا كفالة – و في هذا الصدد سمعت قائل يقول : ” عالم تخاف و متختشيش ” – يبقى برضه حاجة تخنق ، لانه ليه يتقبض عليه من الاصل ، ده واحد جاي يطلب حق !!!!

خلينا برضه نبص انه احيانا بتقوم المظاهرات اللي مش عاجبة حد دي للتنبيه ان في يد من ايدي الفساد لسه بتعبث في المكان الفلاني من البلد ، و احنا عايزين البلد تتطهر من الفساد ، فاروق الباز قال – كفاية انك عارف ان بلدك مش هتتسرق تاني –  و انا بقوله لأ احنا لسه مش متأكدين ، لأن الصدأ ده مكانش زي الالمنيوم الطبقة الاولى بس اللي بتصدي ، لأ ده زي صدى المعادن التانية ، متغلغل و متعمق و ازاحة الطبقة الاولى لا تعني شيئ يا استاذي الفاضل !!!!

ايام حادثة قسم الازبكية – اللي لا اعرف عنها الكثير – في واحد  مش عارفة اسمه قال للمذيعة بتاعة صحافة اون تايم ، انه ليه المواطنين يتظاهرو اصلا ، وليه البلطجة دي ، ليه المظاهرات الفئوية اللي ملهاش لزمة ،طالما النخبة زي انا و حضرتك بنتكلم عن مشاكلهم !!!

و احب اقوله ،لو حضرتك روحت مدينة الانتاج الاعلامي يومها في اتوبيس النقل العام كنت ممكن افكر اصدقك …

و ما نيل المطالب بالتمنى ، و اعتقد الناس البسيطة عرفت ده كويس ، و اعتقد الحكومة – بتاعة تسيير الاعمال – المفروض تبدأ تقوم بدورها و تسير الاعمال بدل ما تعمل خطط خمسية ولا تلزم الدولة و الحكومة اللي جية بحاجات و شروط الشعب ميعرفش عنها حاجة ، و لكن دي قصة اخرى

اخر الكلام ، كل واحد ليه حق ، ليه حق انه يطالب بيه ، اشمعنى انت ؟ و اللي هيقولي فئوية تاني ، هقوله اهو انت!!

تحياتي إلى عمال مصر و فلاحينها البسطاء و الشرفاء حتى لو موصلتش

أسماء خيري

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Tag Cloud

%d bloggers like this: