بعض الشيء عن كل شيء © Asmaa Khairy

Archive for January, 2013

عن الأطفال والإنسانية وبكره! (من وحي يوسف وأطفال القرصاية)

66449_491402310903335_1802213240_n

من رسومات أطفال القراصية – عبد الرحمن أحمد علي

537171_491402277570005_1168930311_n

من رسومات أطفال جزيرة القرصاية : كريم عبد المنعم

رسمة يوسف ردا على رسائل أطفال القرصاية ورسالته ليهم

رسمة يوسف ردا على رسائل أطفال القرصاية ورسالته ليهم

Photo0509

من كام يوم حكيت عن أن وعي الأطفال باللي بيحصل عليهم مهم وإيجابي ..

اللي خلاني أكتب كده كان اكتشافي لوعي أخويا باللي بيحصل في سوريا وفلسطين ووعيه ايام الثورة بيها وفيما بعد بظلم العسكر..

كنت مبسوطة بده، وبعدين جت قصة طفلة فلسطينية اسمها صبا عمرها عمر يوسف 6 سنين وكان نفسها ان سامر العيسوي (الأسير الفسطييني الي بقاله 180 يوم مضرب عن الطعام) يخرج ويبقى حر هو وكل الأسرى..

وعي الأطفال بالي بيحصل حواليهم، بالظلم أو بالوجع الإنساني في أي صورة كانت بيخلق أنواع من البشر عندهم قدرة على استيعاب كل أوجع البشر والعمل على تخفيفها حد قدرته.. مثال على ده .. منى سيف!
بعد ما شفت صور اليوم اللي كان مع أطفال جزيرة القرصاية ورسوماتهم قررت أني أحكي ليوسف أخويا عن قضية جزيرة القرصاية والمحاكمات العسكرية للمدنين

وأنا بحكيله عن اللي الجيش عمله وان الأهالي اطردوا من بيتهم عشان يسيبوا الجزيرة قالي “بس الأرض مش للبيع”

فرجته على صور أطفال القرصاية ورسوماتهم وعلى بيوتهم قالي أنا نفسي أرسم زيهم ..

جبته وقعدنا وكتب اسمه ورسم بيته ورسم بيت القرصاية جنب بعض عشان نعيش كلنا في امان ورسم أطفال القرصاية وهما رايحين لأهاليهم المسجونين بعد ما خرجوا ورسم الوحشين على شكل ذئاب جوة السجن لأن ده مكانهم مش مكان الأهالي..

وقالي أكتبلهم الرسالة دي :”إن شاء الله ترجعوا بيوتكم وإن شاء الله حقكم يرجع”

اتفق معايا أني أرسل الصورة دي عبر الإنترنت زي ما أطفال القرصاية أرسلوا صورهم ..

—————————————————————-

الأكيد أنه الأطفال أكثر إنسانية مننا وأنهم أصدق في مشاعرهم مننا..

هل هيعيشوا في عالم أفضل من اللي احنا فيه؟ أتمنى…

بنبسط لما أحس أنه الأطفال عندهم اهتمام واحساس باللي بيحصل حواليهم .. بنبسط لما احسهم عايزين يساهموا في تخفيف أوجاع الناس ولو برسالة …
نفسي مستقبلهم يبقى زيهم .. حنين!
من  خواطري المهمومة
أسماء

مصر القوية ونظرية غلاف البونبوناية والتحرش!

مساء الخير..

120907135849fZmp

بدون مقدمات خلينا نسمع رأي الجمهور:

“الحجاب بيحمي من التحرش”

“لو هيا لابسة كويس مكنش حد هيقربلها”

“البنات المش محترمة هما اللي بيجيبو الكلام للناس المحترمة، ما هو طبعا هيخاف يقربل للمش محترمة لتبهدله”

إلى نهاية هذه الآراء التي تتهم المرأة بكونها السبب الرئيسي في ظاهرة التحرش، إضافة إلى الغلاء ومرتبات الحكومة اللي مش مخلية الرجالة تعرف تتجوز. كأن اللي بيرتكب الفعل مش الراجل.

ثانيا..

شوية معلومات عني:

أنا مواطنة مصرية مغتربة، عايشة في قطر. عندي 20 سنة تقريبا 14 منهم عيشتهم في مصر.ركبت مواصلات عامة من أول الاتوبيس لحد التاكسي وفي الاسكندرية التورماي.

الردود المتوقعة قبل ما أعرض رأيي

– أنتي عايشة بره ومش حاسة باللي عايشين هنا

-أنتي ملكيش حق تتكلمي طالما مش بتتعرضي للمشكلة يوميا

-أنتي إزاي تبقي ضد الفكرة اللي بتحميكي من الأذى

إلى أخره برضه من الآراء الأورينتد حوالين الفكرة بتاعة “انتي مش حاسة بالوجع فمتشتكيش”

لو هتقولي أي رأي من اللي فوق فنصيحة (عشانك والله مش عشاني) متكملش قراية بدل ما تحرق دمك وتوجع قلبي.  شكرًا

من شوية بدأت مبادرة “أنا مش هسكت على التحرش” و”شفت تحرش” الدعوة لسلسلة بشرية للاعتراض على تخصيص مواصلات للسيدات فقط؛ الفكرة التي طرحها حزب مصر القوية. ولما عرضت رأيي على الفايسبوك بدعم الفكرة جالي انتقاد حاد جدا من أحد الأشخاص. الاعتراض مبني على انه اي تحرك ضد الفكرة مرفوض وأنه الستات محتاجة ده وأنه لو انتي مبتركبيش مواصلات عامة كل يوم متتكلميش. 

وخليني أرتب أفكاري معاكم

  • أولًا: أنا ليه ضد مبادرة مصر القوية! 
  • ثانيًا: أنا ليه مع التحرك لرفض المبادرة! 
  • ثالثًا: ايه البديل اللي عندي؟
  • رابعًا: أنا ليه ضد التحرش!

أنا ضد مبادرة مصر القوية لتخصيص مواصلات للسيدات فقط لأسباب كتيرة الأولى، المبادرة دي عبارة عن مسكن للألم؛ وممكن يخلي المشكلة تتفاقم من غير ما نحس بيها، يعني ببساطة، السيدة اللي هتركب في المواصلات دي مش هتتعرض للتحرش وبالتالي هتتخيل انه انتهى مع ان في سيدة تانية ربما لن تكون لديها القدرة لركوب المواصلات دي ممكن تكون بتتعرض في الوقت ذاته لتحرض افظع من التحرش اللي تعرضتله السيدة الأولى. بالإضافة إلى أنه هيقنع الرأي العام أنه تم إيجاد حل للتحرض وبالتالي في هيتولد في ضمير الرأي العام فكرة أنه التحرش انتهى وأنه دوره لمنعه أصبح مش لازم، فبالتالي المتحرشين هيحسو بأمان وهيعربدوا ويعيثوا فيها فسادا! السبب التاني أنه بتوفيرك للمواصلات دي، ممكن المتحرش ياخدها كاشارة خضراء؛ السيدة التي لن تستقل هذه المواصلات تريد التحرش بها، ومعتقدش المتحرش بس ، المجتمع كله ممكن يقول نفس الكلمة. السبب التالت أنه التحرش مشكلة زي السرطان متفشية في المجتمع كله، كونك توجدلي حل يعزلني عن المتحرش مش معناه انك منعت التحرش، انت فقط منعت فئة قليلة من التعرض للتحرش. السبب الرابع، أن التحرش مش بيحصل في المواصلات بس، والفكرة دي مش هتمنع التحرش في الشوراع. غير كده، المبادرة بتكرس لفكرة “البنات هما السبب” وأنه “عزلهم” هو الحل والأريح لينا وليهم، وبافتراض حسن النية أو سوءها، ده ممكن يمهد لعزل النساء عن المجتمع تاني بحجة حمايتهم وده مرفوض تماما. والسبب الأخير، أنه حل زي ده بيبرهن وبقوة أنه المصريين عندهم مشكلة رهيبة في مهارات حل المشكلات problem solving.

ثانيًا، أنا ليه مع التحرك لرفض الفكرة؟ بالنسبة لي فكرة السلسلة البشرية الرافضة هتولد مناظرة مجتمعية بين الفكرتين. والمناظرة بالنسبة لي هي حوار مجتمعي راقي بيتم فيه تبادل الآراء دون احتكاك ودون مشاكل. والمناظرة مطلوبة في مواضيع زي دي ومطلوبة لاجبار المجتمع على المشاركة في طرح حلول لمشاكله الاجتماعية (مش فالحين بس نفتي في السياسة) مش أخذ دور المتفرج.

ثالثًا، البديل. البديل عندي هو تجريم التحرش، وتعريض المتحرش لعقوبة تبدأ من غرامة وحبس 3 ايام إلى حبس سنة أو ثلاث سنوات إذا تكرر التحرش. ليه العقوبة دي بالذات، لأن أنا لما أجي أحط عقوبة لازم يبقى في بالي الردع العام والخاص ورد الاعتبار للضحية والمجتمع وإعادة تأهيل الجاني. المتحرش سلب حق من حقوق المرأة والمجتمع، في حالة القبض على المتحرش لأول مرة وتغريمه وحبسه ثلاث أيام هيبقى عبارة عن إنذار للجاني ورد اعتبار للضحية. لو تم تكرار الفعلة والقبض على الجاني تاني يبقى الحل هو حبسه وحرمانه من حق الحرية  المقابل لحرمانه لضحيته من حقها في ان تمشي بامان دون إيذائها او امتهان كرامتها، ومقابل استهزائه بالمجتمع وبالدولة لأنه  لم يتعظ من الحبس والغرامة، ومقابل سلبه الأمان من المجتمع بفعلته. فيحبس سنة او ثلاثة حسب تقدير المشرع ويقام خلالها اعادة تأهيله عشان نبقى قضينا على “المرض” اللي عنده.

رابعًا، أنا ليه ضد التحرش؟ أنا ضد التحرش لأن من حقي أمشي بأمان في الشارع من غير ما حد يتعرضلي لفظيا أو جسديا أيا كان شكلي أو لبسي أو لوني أو ديني. لأن لبس المرأة كان ساتر كان فاضح مهواش دعوة لأي شخص للتحرش بالمرأة أو رفضا لتحرشه بيها. في ناس هترد عليا تقولي ربنا قال احتشمن، أيوة ربنا قالي احتشمي ولو أنا محتشمتش ابقى عصيت ربنا وربنا هو اللي يحاسبني مش المتحرش صح؟ ده غير أنه ربني زي ما قالي احتشمي قال للراجل يغض بصره عني، والمتحشمة قبل “المتبرجة”.

أخيرا، إلى أعضاء حزب مصر القوية أنا مش بونبوناية عشان تعزلني وتغلفني عشان تحميني من الدبان. أنا عضوة عاملة فعالة في المجتمع، من حقي أشارك في كل حاجة فيه، عليا ليه واجبات وليا عنده حقوق. والمتحرش مش كائن متطفل على المجتمع، المتحرش عضو فاسد فيه، وبيخل بواجباته ناحيته وناحيتي. دورك، أنك توفرلي حقي في الأمان بأنك تحميني من وجود ظاهرة التحرش، مش تبعدني عنها. دورك أنك تعاقب المتحرش وترد ليا وللمجتمع اعتباره وتأهل المتحرش أن يرجع المجتمع ويكون عضو فاعل ومفيد فيه. الفكرة ممكن تلاقي استحسانًا؛ بس ده مش معناه أنها صح، ده إن دل، يدل على أن احنا بنستسهل.

شكرا ..

أسماء

هام للمصريين المغتربين في الدوحة-قطر| لجنة إصدار بطاقات الرقم القومي (المواعيد والأوراق المطلوبة)

قررت مصلحة الأحوال المدنية بمصر إيفاد لجنة إلى إلى الدوحة لاستخراج بطاقات الرقم القومي للمصريين في دولة قطر.

ستقوم اللجنة بإجرائات استخراج بطاقة الرقم القومي للمصريين الراغبين في ذلك داخل مقر السفارة في الفترة ما بين الخميس 10 يناير 2013 و الأربعاء 16 يناير 2013. ولهذا السبب سيتم مد العمل في السفارة، كما ستكون قيمة استخراج البطاقة هي 50 دولار أمريكي أو ما يعادلها بالريال القطري.

تجدون بالمرفقات خطاب السفارة لمجلس إدارة الجالية المصرية بالدوحة حول المواعيد وفاكس السفارة بخصوص الأوراق المطلوبة.

هذا وجزيل الشكر للسفارة المصرية بالدوحة والسفير  محمد مرسي و لمجلس إدارة الجالية المصرية على عملهم لتسهيل أمور المصريين بالخارج.

خطاب السفارة:

الأوراق المطلوبة:

موقع مصلحة الأحوال المدنية :

http://www.cso.gov.eg/

برجاء النشر والتعميم على كل من تعرف من المصريين في الدوحة للاستفادة من الخدمة المقدمة.

إلى لقاء قريب؛ يا صديق الطفولة…

أمس صلوا عليك وواروك الثرى، لم أكن هناك ولم أودعك وداعا أخيرا …

“عرفتك وأنا لسه صغير.. مكنتش عارف أن العمر قصير”

396868_382370518483547_191797281_n

منذ حوالي خمسة عشر عاما، كنت جالسة في الفصل في المدرسة واعتقد انه كان KG 2 Orange، وبجاوري كان يجلس طفل صغير اسمه طارق محمود وكلانا لم يتمم عامه الخامس بعد. يومها كان لدي مشكلة كبيرة جدا وقتها؛ لم أستطع فتح زجاجة عصير كانت معي. ولحسن حظي يومها كان لدي صديق “عبقري” كما اسمته المُدرَسة فيما بعد (ميس ياسمين)، فقط تمكن بطريقة ما لا اذكرها من فتح  ثقب في غطاء الزجاجة حتى اتمكن من الشرب منها؛ طارق  🙂

على مدار 9 سنوات من دراستي بمصر كان طارق هناك، إما معي في الفصل نفسه أو في الفصل الآخر عندما أصبحت الفصول غير مختلطة. سنة واحدة فقط غاب فيها عندما انتقل فيها طارق من مدرستنا القديمة إلى مدرسة اخرى كانت تعمل فيها والدتي؛ ثم تبعته لنكون سويا إلى أن سافرت أنا بنهاية الصف الثاني الاعدادي..

حاجات بسيطة اللي عندي فيها صور؛ عيد ميلادي وانا صغيرة واحنا متكلفتين بالجواكت وماسكين البالونات وانت بتاخدها مني . رحلة الفيوم مع المدرسة وصور المدرسة الجماعية اللي شكلنا كلنا فيها بيضحك عشان المصور الغتت اللي فضل معانا دايما وهو بيقولنا قولوا تشيييييييز

عسكر وحرامية، و كهربا وخناقات عيال و رخامة مني ومنه . طنط لبنى مامته كانت بتضحك على هبلنا احيانا لما جت اشتغلت في المدرسة. وكبرنا وبقينا في رابعة ابتدائي وجه المدرسة مستر اسمه محمد سعيد وبدأت رحلة الخماسي المرح (طارق واسلام ويوسف ومشمش وأسماء) و النادي العلمي تعيس الحظ و كل اوقات الفراغ في المعمل (1) اللي في المبنى التاني في المدرسة.

سنة خمسة لما جيتو معانا الفصل انت وياسر واسلام ويوسف ومشمش ومروان وكل ذكرياتها الحلوة خصوصا وانت في الرايحة والجاية تسأل ميس نهى “why” والموقف بتاع ياسر اللي افتكرناه سوا من اسبوعين لما اتكلمنا. و لما كنا بنيجي نشجعكم في الدوري

سنة ستة لما كنتو بتعملوا مصايب انتو وفصلكم الجديد زي يوم ما عملتم حرب بالمية قدام المبنى بتاعنا وقولنالكم هنغطي عليكم 😀

السلام كل فترة وفترة والرغي في حاجات ملهاش لزمة ايام ما كنا اطفال

لما سافرت و كنا كل فترة بنسأل بعض السؤال ده على الفايس كاننا متكلمناش من ساعة ما سافرت “فاكرني” فاكراني”

لما واحنا صغيرين تقولي هبقى اطول منك ولما كبرنا واتكلمنا وسألتني اتغيرتي .. وقولتلك طولت .. قولتلي قد ايه فقولتلك .. قولتلي انك اطول مني .. ساعتها قولتلك كويس لاني متعقدة مفيش حد اطول مني دلوقتي الا حد واحد بس بالاضافة ليك .. دلوقتي بقى واحد بس من غيرك 😦

وحتى في الثورة؛ أغلبكم نزل وكان هناك وكنا على قلب واحد رغم اني كنت بعيدة..

ويوم الانتخابات

rs

المجد للشهداء الذين ماتوا من أجل وطن أفضل لنا جميعا؛ والمجد لكل من حفظ دمائهم..

طارق؛ قبل أن ترحل عنا قلت للجميع أنها ستكون سنة جديدة وسعيدة؛ لعلك الآن هانىء وسعيد حيثما أنت.. اتمنى ربنا ينزلك منزلة الشهداء الذين مجدتهم ..

رحمة الله عليك وهو القادر على ان يربض ويطمئن قلب والديك ويحفظهما من كل سوء..

“ملحقتش أقولك أني قدرتك…”

 إلى لقاء قريب يا صديق الطفولة.. نحسبه في الجنة

برجاء الدعاء له ولو بظهر الغيب ..

أسماء

Tag Cloud

%d bloggers like this: