بعض الشيء عن كل شيء © Asmaa Khairy

Posts tagged ‘بورصة،مصر،25يناير،شباب،واجب،اقتصاد’

العواجيز لا يمثلوننا ..ولا انتم ..والدم في رقبة المحرض…

كل ما أتكلم مع حد وأقول أني بدعم الولاد اللي قدام الاتحادية يقولولي “وبتدعمي كمان البرادعي وحمدين صباحي اللي حطو ايدهم في ايد الفلول عمرو موسى”

لا … مفيش حد من العواجيز بيمثل الشباب اللي بتموت في الشارع

لا البرادعي ولا حمدين ولا موسى نزلوا الشارع الا لماما ولا عمرهم حضروا اشتباكات ولا شمو غاز ولا جسمهم اتخرم خرطوش ولما نزلو التحرير في نوفمبر 2012 جمعوا الناس حواليهم في الصينية وسابو الولاد يضربوا على اطراف الميدان و معمللهمش حاجة..

آه ممكن من الشباب اللي يكون شايفهم مثل أعلى أو سياسيين اقوياء .. (البرادعي و حمدين) و حمدين خد اقل من مرسي بأصوات قليلة .. وناس كتير بتدعمه ..

المهم انه محدش فيهم هناك بنفسه .. محدش فيهم بيقود الحشود ..

والاخوان مش بيمثلوا الشعب

للتوضيح بس انتو مش مصر كلها و مصر مش كلها اخوان و مش مصر كلها حاباكم .. وشرعية الرئيس مش هيتم الحفاظ عليها لو اهدرتوا دم ..

آه الناس انتخبته و فاز بأغلبية 51% .. رئيسا مدنيا شرعيا للبلاد

يوم ما يقتل .. يوم ما يسيب الناس تتقتل هيفقد شرعيته

و لازم تعلموا تطلعوا بره الشرنقة اللي انتو فيها بقالكم  80 سنة … لازم تحلوا الجماعة كلها من السمع والطاعة ..

اللي مات (ثائر -اخوان) دمه في رقبة مكتب الارشاد و وزارة الداخلية و محمد مرسي …

توالت الدعوات لمدة اسبوعين قبل الخامس من ديسمبر من قيادات الاخوان للنزول حيث المعارضة .. ثم تم سحبها كل مرة تذرعا بحقن الدماء .. لماذا تخليتم عن حقنكم للدماء هذه المرة ..

الناس بتموت في الاشتباكات

الناس بتموت في الاشتباكات .. و ده متوقع.. خصوصا في اشتباكات زي امبارح الطرفيين مشحونين على الاخر (خصوصا الثوار اللي اتضربوا 11 يوم ورا بعض و لحد دلؤقتي مرسي مجابش سيرتهم بكلمة) و الاخوان اللي مفهمينهم اننا اعداء الدين لاننا رافضين الاعلان الدكتاتوري بتاعه

المحرض والحامي والمسؤول عن الحماية

لو حد ضربك اضربه .. كلمة بابايا علمهالي من وانا صغيرة .. وكل اب في مصر بيعملها لابنه .. عشان تبقى راجل لازم تعرف تاخد حقك ..

لما حد يعتدي عليك هتدافع عن نفسك و الا مش هتبقى راجل ..

الاخوان بالنسبة ليهم النزول عند الاتحادية اعتداء عليهم (تفكير عقيم)

و لما راحوا فاكرين نفسهم بيدافعوا عن حقهم اعتدوا على المعتصمين  وهكذا بدأت و انتهت الاشتباكات و سقط شهداء من الطرفين ..

لكن كل الدم اللي نزل في رقبة المحرض : مكتب الارشاد اللي نزل الشباب الاخواني هناك … الحامي .. الي هو المفروض وزارة الداخلية اللي في دولة ما محترمة المفروض انها تحمي اي اعتصام او مظاهرة سلمية  و المسؤول عن الحماية و هو القائد الأعلى للشرطة رئيس الجمهورية  بصفته لا بشخصه محمد مرسي .

مرسي رئيس منتخب ما ينزل وحدة خاصة من الجيش تخلص الموضوع

زمان كان حرام و عيب و مستحيل وغير انساني انه الجيش او الامن المركزي يقتل الناس .. لكن دلؤقتي يا مرسي نزل الجيش و خلص .. ليه تحولتم لحيوانات منعدمة الرحمة لأنكم تدعمون من هو في مركز القوة ؟ زميل سوري لي قال نفس الكلمة… يعني بشار له حق يقتلكم عشان هو شايف انه صح و احنا لا ؟ الدم كله حرام .. (والكلام ده مخصوص لزمايلي في الجامعة  ولأي حد بيتبنى رأيهم)

كفاية كده عشان معيطش

سلام (يا رب انزل سلام على ارض مصر )

أسماء

البورصة هتفتح يا ولاد

احساس غريب يروادني عند الحديث عن البورصة

نقرأ عنها نسمع أخبارها و لكن أن يُتداول الحديث عنها بين الناس .. أمر جديد علينا

و لكن ماذا بعد الحديث

فالبورصة هي دعامة للاقتصاد المصري ، و غلقها طوال الفترة السابقة كان خطئا كبيراً ، في حق الاقتصاد المصري ، و اذا تغاضينا عن ما فات ، فالقادم أهم  ، وهو ليس بيد شخص أو شركة واحدة ، بل هو بيد الدائرة الاقتصادية كاملة

أولا دعونا من خلال رؤية ليست خبيرة  ، و لكن على بعض من علم ، نستعرض الوضع الاقتصادي لمصر

الآن مصر على باب مرحلة اقتصادية مهمة ، سيكون لدينا في غضون 6 اشهر انتخابات برلمانية تليها الرئاسية يليها كل الخطوات التي اتفق عليها الشعب عندما قال نعم للتعديلات الدستورية ، و بعيدا عن نعم و لا ، طلعت النتيجة ، و يجب علينا الاخذ في الحسبان ان الانتخابات التي ستشهدها مصر ستؤثر على كيانها الاقتصادي ،و يجب علينا دعمه بكل الطرق الممكنة

رسالتي قبل أن تكون للمصريين بالداخل هيا للمغتربين

بكره البورصة هتفتح

لازم نساهم ، لو اللي جوة ضهرهم مقطوم .. فاحنا شوية ضهرنا اقوى

لازم نساهم

ساهم و لو بشراء سهم

اشتري اسهم الشركات اللي كانت هتروح مننا

زي مثلا عمر افندي

الخبراء قالوا خايفين من حركة بيع بيع بيع

فاحنا جوة و بره لازم و لو بس ب 100 جنيه

اللي يقدر .. عشان حركة الشرا تبقى موازية لحركة البيع

مقدرش افيدكم بمصطلحات اقتصادية معقدة ، لاني فاهمة اقتصاد بس مبكتبش فيه

انما اللي فاهماه كطفلة حتى

انه اقتصاد البلد ده محتاجلنا

لو تقدر تدعمه بقرش ادعمه

لو متقدرش ، و تقدر تدعمه بعلم و افكار ادعمه

و لو متقدرش

و بس تقدر تنشر الافكار

انشرها

يمكن .. بل اكيد .. حد هيسمع الندا و يلبي

تحيا بلدنا .. و يحيا الشعب

اسماء خيري

Tag Cloud

%d bloggers like this: