بعض الشيء عن كل شيء © Asmaa Khairy

Posts tagged ‘عم صابر’

اضحكوا على رجولتكم المنعدمة | عن سحلة عم صابر

مش مضايقة انكم بتضحكوا، اضحكوا عادي براحتكم.. حقكم.. بس متضحكوش على الراجل

اضحكوا على نفسكم ورجولتكم اللي انعدمت وانتو بتتريقوا على راجل مستضعف قد ابوكم زمانه متكلبش في السرير في مستشفى الشرطة ومراته معرفتش تدخله والشرطة قالتلها تقول ايه بدل ما هيعملوا ويسووا فيها وفيه وفي عيالها

اضحكوا على رجولتكم وانتو معرفتوش تحموا “ستات” البنات اللي اتعروا على ايد الجيش والداخلية واللي المتحرشين اللي الميدان اللي انتم امنه اتعروا فيه
اضحكوا لان ناس كتير منكم حصلها كده.. الظابط دخل ايده تحت هدومه و رفعها عشان يكتفه، وقلعه بنطلونها عشان يذله، وغمى عنيه عشان يخوفه
اضحكوا عشان كتير منكم شاف الضلمة في المدرعة وذل انك تبقى رحمة عسكري بيذلك عشان هو مذلول وعارف انك نازل تجيب حقه بس ده اكل عيشه

مين اتسحل قبل كده وجه حقه؟
مين اتعذب قبل كده وجه حقه؟
مين مات من التعذيب وجه حقه؟

صفر

متزعلوش من واحدة ست غلبانة خايفة من ظباط يعملوا حاجة فيها ولا يأذوا جوزها وياخدوه منها ولا يعوروا ابنها…

مش كل الناس عندها القدرة تقول لا ومش كل الناس حاسة بالامان اللي عند الناس اللي عارفة انه ليها اصحاب معروفين هيعرفوا يعملوا دوشة ويخرجوها!!!

وبعدين لحظة

ده بالصدفة عم صابر اضرب تحت كاميرا اون تي في.. لو مكنش ده حصل، مكنتوش هتتحركوا خطوة ومكنش هيبقى في حد بيلسن عليه والداخلية مكانتش هتهدد مراته!!!

يمكن بعد كل ده يطلع الخمسيني المستضعف ده ارجل منكم كلكم، وانوا كان بيحامي على مراته وعياله بكرامته وحقه..

متتريقوش عليه.. عايزين تضحكوا، اضحكوا على خيبتكم اضحكوا على رجولتكم المنعدمة

عايزين تسترجلوا.. هاتوا حقه وحق كل اللي اتسحل واتعرى واتهان واتعرى تاني على الالسنة!

19081_481875625208615_50854438_n

Tag Cloud

%d bloggers like this: